Knaben
Arapaho
Hoii Zemme,
üsi Gruppe, Arapaho, bestaht us 4 guet gluunte Buebe und 2 tolle Leiter.
De Noé, Jonas, Finley und de Gregori sind immer debii wenn es heisst das miir in Schuumstoffruum gönd, was sie au gern machet isch usse gah und echli miteme Ball ume spiele.
Bi Schoggi seit niemer vo üs nei und wenns au mal si muess gits mal en gsunde Öpfel zum Zvieri.
Eusi Leiter träget d’Näme Maximo und Etienne.
Koyukotana
Mir sind d’Gruppe Koyukotana vo de Jubla Uznach. Eusi Lieblingstätigkeit i de Jubla isch es im Schumstoffrum zemme z’spiele. Mit üsne Leiter em Elia, Jonas, Noah, Simon und em Levi erlebet mir immer wieder neui Abentür.
Egal ob dine oder dusse, im Winter oder Summer, mir sind immer motiviert und hends lustig zemme.
Tapfer und Treu
Koyukotana
Havasupai
Mir sind ä top motivierti Jungwachtgruppe wo sehr gern im Schumstoffruum isch und sich sehr gern ustobt. Mir spieled am liebste verusse es 15, 14 oder anderi cooli spieli. Au für es Füür im Wald simmer immer z ha.
Üsi Leiter sind de Lino und de Sirius.
Tapfer und Treu, d Gruppe Havasupai
Mädchen
Haliwa
Sali mitenand, mir sind 12 sehr aktivi Meitlis, wo am allerliäbstä üsi Leiterinnä im Schuumstoffruum vergrabed.
Wämmer nöd grad im Schuumstofruum sind, ässed mer gärn Schoggi mit Brot und trinkät däzuä än süässä Sirup.
Bisher hämmer scho vill ufregendi Ereignis i dä Gruppis dörfä erläbä. Mir händ zum Bischpiel scho mit zwei Orangutans Versteckis gspillt oder ganz feini Guezlis bachä.
Eusi Leiterinnä sind d’Lena, d’Lorena, d’Michelle, d’Ronja, d’Yara und d’Flavia.
Cuyama
Hoi zemme,
mir sind die 6 Meitli vo de Gruppe Cuyama.
Am liebste düend mir i de Gruppi Popcorn esse, in Wald go Schlangebroot brötle, im Schuumstoffruum sii oder Sache mache wo üsi Leiterinne nöd wennd. Mir sind d’Emilia, d’Lena, d’Anna, d’Lena, d’Hanna und d’Mia.
Üsi Leiterinne sind d‘Sina und d‘Elin
Kaleas
Wer sind mir?
Mir sind d’Gruppe Kaleas und zwar d’Aurelia, d’Maelle, d’Elen, d’Julia, d’Norina, d’Mia, d’Jivin, d’Estelle, d’Lenja, d’Lienne, d’Elisha, d’Francesca, d’Elin, d’Nina, d’Maeva und d’Lia. Üsi Leiterinne sind d’Jana, d’Francine, d’Samira und d’Moja.
Welles Tier wäred ihr am liebste?
Fuultier: will mer als Fuultier de ganz Tag cha schlafe und nöd id Schuel mues.
Hund: wills herzig sind, belle chönd und umespringe chönd.
Welles Lied singemer am Lagerfür am liebste?
“Up in the Sky”, “Country Roads”, “oh wänn de Sänn” (nöd einstimmig)
Was macht üsi Gruppe speziell?
«hmmm das isch eh mega schwirigi Fraag…» «villicht dass mir die beste und die küülste sind? gaht das?»
Wer isch üses Gruppemaskottchen?
‘Schreiend’: «DE DINO JOSHUA!!!»
Was sind üsi beste Lagererläbnis?
Elen: d’Badi Wattwil
Maeva: s’Gländgame, dött gwünni immer😎
Aurelia: ide Nacht Süessigkeite ässe
Elisha: mit de Buebe Räuber und Bulle spiele
Estelle: d’Aktion X😱
Welli Superchraft hetted mir am liebste?
flüüge, mit Tier rede, unsichtbar sii, uh schnell sii
Was dörf uf de Pizza nöd fehle?
«alles wo uf d’Pizza ghört, dörf nöd fähle»
Welles isch üse Lieblingsfilm?
Troll, Yes-Day, Sing, immer Ärger mit Grandpa, Twilight
Antwort vode Leiterinne: Bibi & Tina
Cascades
Mir sind e Gruppe vo 10 fröhliche und motivierte Meitli. Mit üsne Leiterinne Jael und Rebecca tüend mir gern Mörderlis spiele, bastle, bache und im Schumstoffruum üsi Leiterinne vergrabe. Mir freued üs immer über jedes neue Gsicht i de Gruppe und uf vieli wiiteri cooli Gruppis.
Kawaiisu
Hoi zämä!
Mir sind die coolsti Meitligruppe und heisset Kawaiisu.
Üsi Gruppe bestaht us 17 ufgstellte Meitli. Mir düänd i dä Gruppis gärn Spieli spiele, bastlä, ässä, dussä si und ganz viel lachä, zämä mit üsnä Leiterinnä dä Amelie, Chantal, Hanah und Livia 😉
